Joriy yilning 7-aprel kuni Prezidentimiz rahbarligida o‘tkazilgan videoselektor yig‘ilishida sport infratuzilmasini rivojlantirish, mahallalarda ommaviy sportni kengaytirish hamda yoshlarning bo‘sh vaqtini mazmunli tashkil etish bo‘yicha muhim vazifalar belgilangan edi. Ushbu topshiriqlar ijrosini ta’minlash maqsadida Termiz shahrida “Sog‘lom tanda – sifatli tibbiyot” shiori ostida kasaba uyushmasi kubogi sport musobaqasining viloyat bosqichi ochildi.
“Surxon arena” sport majmuasida boshlangan ochilish marosimida viloyat sport boshqarmasi boshlig‘i Ravshanbek Xudoyberdiyevich so‘zga chiqib, musobaqaning maqsad va ahamiyati haqida to‘xtalib o‘tdi hamda ishtirokchilarga omad tiladi.
Musobaqa doirasida mini futbol, shaxmat, shashka, stol tennisi va voleybol turlari bo‘yicha qizg‘in bellashuvlar tashkil etildi. Ishtirokchilar o‘z mahorati, tezkorligi va jamoaviy o‘yinlari bilan tomoshabinlar e’tiborini qozondi.
Yakuniy natijalarga ko‘ra, eng yaxshi ishtirokchilar diplom, medal, esdalik sovg‘alari hamda pul mukofotlari bilan taqdirlandi. Tadbir viloyatda ommaviy sportni rivojlantirish va sog‘lom turmush tarzini keng targ‘ib qilishga xizmat qilmoqda.
