Surxondaryo viloyatida bu yilgi Navro‘z umumxalq bayrami Termiz tumani “Yangi O‘zbekiston” massivi amfiteatrida katta shov-shuv bilan nishonlanmoqda. Amfiteatr maydoni bayramona bezaklar bilan bezalib, rang-barang bayroq va gulchambarlar ostida yoshlar sportning arqon tortish, tosh ko‘tarish, stol tennis, shaxmat va shashka turlarida o‘z mahoratini sinovdan o‘tkazmoqda.
Har bir bellashuv tomoshabinlarda katta qiziqish uyg‘otmoqda: arqon tortishda kuch va chidamlilik, tosh ko‘tarishda jasorat va bardoshlilik, stol tennisi va shashka musobaqalarida esa tezkor fikrlash va strategik mahorat namoyon bo‘lmoqda. Yoshlar o‘z tayyorgarligi va mehnatini namoyish etib, har bir raqibga hurmat bilan qarashmoqda, shu bilan birga tomoshabinlarni hayratda qoldiruvchi g‘alabalarga erishmoqda.
Tadbirda faol ishtirok etayotgan ko‘ngillilar ham bayram ruhini ko‘tarib, musobaqalarning tartibli va qiziqarli o‘tishini ta’minlamoqda. G‘oliblarga diplom va estalik sovg‘alar topshirilib, ularning mehnati va mahorati alohida e’tirof etilmoqda.
Navro‘z tantanalari nafaqat sportni rag‘batlantiradi, balki xalqimizning qadimiy an’analari, milliy qadriyatlari, oila va do‘stlik rishtalarini mustahkamlash hamda inson qadrini ulug‘lashga xizmat qilmoqda. Bayram shodiyonalari va musobaqalar ishtirokchilarda mustahkam irodani, jismoniy chidamlilikni va bir-biriga hurmatni oshirishga yordam bermoqda.
