Surxondaryo viloyati hokimi Ulug‘bek Qosimov Angor va Jarqo‘rg‘on tumanlariga tashrifi davomida aholi farovonligini oshirish, yangi ish o‘rinlari yaratish va tadbirkorlikni rivojlantirishga qaratilgan loyihalar taqdimoti bilan tanishdi.
Angor tumanining “Yangiobod” mahallasida kollektorni zamonaviy va ilmiy yondashuv asosida yopish hamda hududda yangi loyihalarni amalga oshirish ishlari ko‘zdan kechirildi. Jarqo‘rg‘on tumanida esa eko bozor qurilishiga start berilib, savdo va maishiy xizmat nuqtalari, istirohat bog‘i, dam olish maskani va transport-logistika markazi loyihalari taqdim etildi.
Taqdimotlar yakunida loyihalarni takomillashtirish, bo‘sh maydonlarni auksionga chiqarish va salohiyatli tadbirkorlarni jalb etish bo‘yicha mas’ullarga tegishli topshiriqlar berildi.
