Prezident farmoniga muvofiq, 2026-yil 1-fevraldan boshlab Kambag‘al oilalar reyestriga kiritilgan oilalardagi yoshlar uchun qator muhim imtiyozlar joriy etiladi.
Xususan, mazkur toifaga mansub yoshlar uchun safarbarlik chaqiruvi rezervidagi harbiy xizmatni bepul o‘tash tartibi yo‘lga qo‘yiladi. Bu esa yoshlarning harbiy xizmat bilan bog‘liq xarajatlarini kamaytirishga xizmat qiladi.
Shuningdek, “Yoshlar daftari” jamg‘armalari orqali avtomoto transport haydovchilarini tayyorlash bo‘yicha o‘quv kurslari xarajatlarini qoplash uchun subsidiya ajratiladi. Mazkur subsidiyalar haydovchilik guvohnomasining “A”, “B”, “D” va “DE” toifalarini olish uchun to‘lab beriladi.
Ushbu imtiyozlar yoshlarni kasbga yo‘naltirish, bandligini ta’minlash hamda ularni ijtimoiy qo‘llab-quvvatlashni kuchaytirishga qaratilgan muhim tashabbus hisoblanadi.
