Ayni kunlarda viloyatimizdagi har bir mahallada bittadan ko‘chani namunali hududga aylantirish ishlari amalga oshirilyapti. Viloyat hokimi Ulug‘bek Qosimov mazkur tashabbuslar ijrosi bilan Jarqo‘rg‘on tumanidagi “Neftchilar” mahallasi misolida tanishdi. Belgilangan rejalarga muvofiq, mahallada ichki yo‘llar ta’mirlangan, ariqlar betonlashtirilib, elektr ta’minotini yaxshilash maqsadida beton ustunlar o‘rnatilgan.
6,3 ming nafar aholi yashovchi ushbu mahallaning asosiy drayveri — dehqonchilik, issiqxona xo‘jaligi, shuningdek, savdo va xizmat ko‘rsatish sohalaridir. Joriy yilning o‘tgan davri mobaynida mazkur yo‘nalishlarda 78 ta yangi ish o‘rni yaratilgan.
Viloyat rahbari “mahalla yettiligi” a’zolari, nuroniylar va faollar ishtirokida hududdagi mavjud muammolarni o‘rgandi. Ichki yo‘llarni ta’mirlashni yakunlash, kommunal xizmatlar sifati va qamrovini oshirish, shuningdek, yangi ish o‘rinlari yaratishga qaratilgan mikroloyihalarni amalga oshirish yuzasidan tegishli topshiriqlar berildi. Shu bilan birga, mahalla markazini yanada obod qilish maqsadida tashabbuskorlar ishtirokida saylgoh barpo etish loyihasini ishlab chiqish va taqdimotga tayyorlash vazifasi yuklatildi.
