Qiziriq tumanida ijtimoiy himoyaga muhtoj oilalar farzandlarini qo‘llab-quvvatlash maqsadida yangi — 2025/2026-o‘quv yili arafasida «Nuroniylar» jamg‘armasi tomonidan navbatdagi xayrli tashabbus amalga oshirildi. Tuman hokimi Sherxon Allamurotov hamda tuman «Nuroniylar» kengashi rahbari Hamid Kenjayev kam ta’minlangan oilalarning xonadonlarida bo‘lib farzandlariga maktab formalari va o‘quv jihozlarini topshirdilar.
Mazkur tadbir bolalarning yangi o‘quv yilini munosib va quvonchli tarzda boshlashlari ta’lim olishga bo‘lgan qiziqishlarini yanada oshirishga xizmat qildi. Ota-onalar va mahalla aholisi bunday e’tibor uchun tashakkur izhor etib, mazkur sa’y-harakatlar yosh avlodni qo‘llab-quvvatlashga qaratilganini alohida qayd etdilar.
