Yosh shaxmatchilar bellashdi

Sport bilan shug‘ullanishni bolalikdan boshlamoqni tavsiya qilishadi. albatta, ushbu tavsiyalarda jon bor. Sababi, yosh organizm ayni mashg‘ulotlarga, harakatlarga moslashadi. Jismoniy kuch talab etadigan sport turlari bilan birga aqlni charxlovchi turlar ham kichik yoshdan shug‘ullanishni talab etadi. Shaxmatda yaxshi dona surish uchun o‘yin qoidalarini, dona surish usullarini bolalikdan bilish, kelgusida katta muvaffaqiyat garovidir.
Shu jihatlarni hisobga olgan holda yurtimizda maktabgacha yoshdanoq bolajonlar shaxmat o‘ynashga qiziqtiriladi. Shaxmat-shashka musobaqalari esa ularning ushbu sport turlarini nechog‘lik bilishlarini namoyon etadi. Ayni maqsadda maktabgacha ta’lim tashkilotlari tarbiyalanuvchilari o‘rtasida shaxmat musobaqasining viloyat bosqichi bo‘lib o‘tdi.
Yakuniy natijalarga ko‘ra o‘g‘il bolalar o‘rtasida Qiziriq tumanidagi 5-sonli DMTT tarbiyalanuvchisi Farhod Ramazonov, qiz bolalar o‘rtasida Termiz shahridagi “Sehrli qasr” MTT tarbiyalanuvchisi Imona Jumanazarovalar 1-o‘rinni qo‘lga kiritdilar. G‘oliblar munosib taqdirlandi.