Mezbonlar ikkinchi o‘rinda

Termiz davlat universiteti dzyudo bo‘yicha “Universiada-2025” respublika musobaqasining final bosqichiga mezbonlik qilganidan xabaringiz bor. Ushbu nufuzli musobaqada Qoraqalpog‘iston Respublikasi, Toshkent shahri va viloyatlardan jami 200 nafarga yaqin sportchi-talaba ishtirok etdi.
O‘g‘il bolalar 7 ta, qizlar ham shuncha vazn toifasida g‘oliblik uchun gilamga chiqib, o‘z mahorati va jismoniy tayyorgarligini sinovdan o‘tkazishdi. Qizg‘in bahslar yakunida umumjamoa hisobida Toshkent viloyati 3-, Surxondaryo viloyati 2-o‘rin bilan kifoyalangan bo‘lsa, 1-o‘rin Buxoro viloyati yoshlariga nasib etdi.
G‘olib va sovrindorlar diplom, medal hamda qimmatbaho esdalik sovg‘alari bilan taqdirlandilar. Ushbu musobaqa nafaqat kuchli sportchilarni saralash, balki talabalar o‘rtasida do‘stlik va ahillikni mustahkamlashga ham xizmat qilganligi bilan ham ahamiyatli bo‘ldi.