Joriy yilning 25-noyabrida 405-sonli Prezident qarori qabul qilindi. Qaror bilan mahallalarda katta hayotiy tajribaga ega bo‘lgan obro‘-e’tiborli uch nafar faol nuroniy beshta kambag‘al oilaga biriktiriladi.
Oilalarni kambag‘allikdan chiqarishda nuroniylarning asosiy faoliyat yo‘nalishlari ham belgilab berilgan. Ya’ni xonadon tomorqasidan samarali foydalanish va kichik ishlab chiqarish uskunalari va boshqa zarur texnika vositalarini bo‘lib to‘lash sharti bilan ijaraga olishga yordamlashadi. Shuningdek, nuroniylar oila farzandlarini hunarmand va ustalarga shogirdlikka biriktirish, ushbu oilalarning ta’lim muassasalarida o‘qiyotgan farzandlarini o‘quv jihozlari va qurollari hamda sport kiyimlari bilan ta’minlashga ko‘maklashadi.
Piyoda yurish madaniyatini targ‘ib qilish bilan birga keksa yoshdagi fuqarolar uchun mos keladigan sport tadbirlarini tashkil etish, ularni jismoniy tarbiya va sport bilan shug‘ullanishga jalb etgan faol nuroniylar har oyda MHTEKM (1 125 000 so‘m)ning 50 foizi miqdorida rag‘batlantirib boriladi.
Keksa yoshdagi fuqarolarni sportga jalb qilish uchun har bir mahallaga yiliga 10 million so‘m miqdorida mablag‘ ajratiladi.
Muxiddin Buriyev,
Qiziriq tuman Adliya bo‘limi davlat xizmatlari markazi bo‘lim boshlig‘i
