Volontyorlar faollik ko‘rsatishmoqda

Har kuni erta tongdan kun botguniga qadar ikki smenada oliygohlarga o‘qishga kirish uchun imtihonlar bo‘lib o‘tmoqda. Abituriyentlar imtihonlarga kirib ketar ekan, ularni qo‘llab-quvvatlash maqsadida kelgan ota-onalari va yaqinlari ham farzandlaridan kam hayajonda emas.
E’tirof etish kerakki, ota-onalarining kutishlari uchun barcha shart-sharoitlar yaratilgan xonalar hozirlangan. Salqin xonalarda imtihon jarayonlarini to‘g‘ridan-to‘g‘ri kuzatib turishlari mumkin. Xo‘sh, imtihon qanday o‘tadi? Testlarni ishlash qiyinchilik tug‘dirmaydimi? Abituriyentlarga qancha vaqt ajratiladi-yu, qaysi fanlardan savollar o‘rin olgan kabi shu va shu kabi boshqa savollar ota-onalarni qiziqtirishi aniq. Ana shunday jarayonlarda ota-onalar hamda abituriyentlarga yanada kengroq qulayliklar yaratish maqsadida Termiz davlat universitetining volontyor talabalari ham faol ishtirok etishmoqda.
Volontyor yoshlar erta tongdan abituriyentlar va ularning ota-onalarini xush kayfiyatda kutib olib, Ro‘zi Choriyev nomidagi san’at maktabidagi kutish zallariga kuzatib qo‘yishmoqda. Ular bilan suhbatlar o‘tkazib, qiziqtirgan savollariga javob va test to‘g‘risida kerakli ma’lumotlarni berishayotir, qiziqarli so‘rovnomalar o‘tkazishyapti. Ota-onalar yaratilgan sharoitlar va volontyor yoshlarning munosabatidan mamnun.