Termiziy alloma Ginnesning rekordlar kitobida

Abu Iso Muhammad Termiziy (824–892)ning “Ash-shamoil an-nabaviya” (“Payg‘ambarga xos siyrat va fazilatlar”) asari dunyo miqyosida eng ko‘p nashr etilgan asar sifatida Ginnesning rekordlar kitobidan o‘rin olgan.
Nomidan ham ko‘rinib turibdiki, bu asar payg‘ambar alayhissalomning shaxsiy hayotlari, u kishining suvrat va siyratlari, ajoyib fazilatlari, odatlariga oid 408 hadisi sharifni o‘z ichiga qamragan manbadir.
Muhammad alayhissalomning hayotiga doir muhim manba sifatida e’tirof etilguvchu ushbu “Ash-shamoil an-nabaviya” asari azaldan islomshunos olimlar, tadqiqotchilarning diqqatini o‘ziga tortib keladi. Arab tilida yozilgan mazkur asarga bir qancha sharhlar ham yozilgan. Asarning afzalligi shundaki, tili ravon, uslubi esa g‘oyatda oddiydir. Termiziyning asarlari ichida eng mashhuri, shubhasiz, “Al-jomi’” bo‘lib, u oltita ishonchli hadislar to‘plamlaridan biridir.