Yurtimizda turizm sohasini rivojlantirish o‘z-o‘zidan bo‘lmaydi, albatta. Buning uchun zarur shart-sharoit va xizmat turlarini yaratishning o‘zi bilan ish bitmaydi. Yurtimizning, ayniqsa, janubiy vohaning turistik salohiyatini namoyon etish ishlarini boshlash, tag‘ibot-tashviqot ishlarini olib borish, tashabbusni kuchaytirish, yangidan-yangi g‘oyalarni ishlab chiqish lozim. Ana shundagina turistlar oqimini jalb qilish, turistik salohiyatimizni to‘la namoyon eta olishimiz mumkin.
MDH davlatlaridan kamida 1 million sayyohni jalb etish maqsadida Surxondaryo viloyati delegatsiyasi Tojikiston Respublikasining Dushanbe shahrida bo‘lishdi. Viloyatdan tashrif buyurgan delegatsiya Tojikiston turizmni rivojlantirish qo‘mitasida bo‘lib, sayyohlik sohasida ikki tomonlama aloqalarni rivojlantirish, “Termiziylar yurtiga sayohat” dasturi doirasida Surxondaryo viloyatiga 100 ming nafar tojikistonlik turistlarning sayohatini tashkil etish bo‘yicha kelishuv shartnomalarini imzolashdi.
Ishonchimiz komil, vohamizga mehmon bo‘lajak turistlar o‘tkazgan vaqtiga sira achinishmaydi. Qadimiy shahrimizni, qadimiy qadamjo va ziyoratgohlarimizni sayr-u sayohat qilib, olam-olam taassurot olishadi, yangi bir olamni kashf etgandek bo‘lishadi. Bu esa Surxondaryo viloyatiga kelib, sayohat qiluvchilarning sonini ortishiga xizmat qilsa, ajab emas.
H.Baxtiyorova
