Egnida yulduzchali pagoni bor ichki ishlar organlari xodimlarini ko‘rgan bola borki, katta bo‘lsa, xuddi shunday libos kiyib, ona Vatanga xizmat qilish haqida orzulanadi. Bu libosning, bu pagonning o‘z mas’uliyati, sharafli burchi bor. Bu burchni vatanning mard o‘g‘lonlari sidqidildan ado etishga bel bog‘lashgan. 25-oktyabr – Ichki ishlar idoralari xodimlari kuni. Bu kunni soha xodimlari alohida xursandchilik bilan bayram sifatida nishonlaydi. Bu kunda munosib xizmatda bo‘lganlar e’tiborga tushadi, e’tirof etiladi.
Termiz shahridagi “Nigina” tantanalar saroyida ham sana munosabati bilan soha xodimlariga bag‘ishlangan katta bayram tadbiri bo‘lib o‘tdi. Tadbirda shahar hokimi O‘.To‘rayev so‘zga chiqib, o‘z hayotini el-yurt tinchligi va osoyishtaligini asrashdek ezgu va olijanob ishga bag‘ishlagan mard va sadoqatli, vatanparvar yurt posbonlari sha’niga samimiy tilaklar bildirdi.
Tilaklarga ulanib ketgan ajoyib kontsert dasturi esa bayramga o‘zgacha fusun va tarovat bahsh etdi. Shahar madaniyat bo‘limining xushovoz xonandalari tomonidan ijro etilgan kuy-qo‘shiqlar esa tadbir ishtirokchilarini raqsga chorladi.
S.Davlatova
