Bo‘sh vaqtni maroqli o‘tkazishning eng yaxshi usuli — mutolaadir. Eng yaxshi do‘st, eng yaxshi sirdosh ham, ustoz-u, oq va qorani tanishga yordam berguvchi ham kitobdir. Ayniqsa, talabalar turar joyida istiqomat qilguvchi yigit-qizlar yotoqxonaning ma’naviyat va ma’rifat xonasida jam bo‘lgan jamiiki badiiy kitoblarni o‘qib bo‘lib, zerikishga chora topa olmayotgan bo‘lsa, buning yechimi bor.
Yoshlar ishlari agentligi direktori A.Sa’dullayev “Kitob karvoni” loyihasi doirasida 1400 dona kitobni oldi-da Surxondaryo viloyatida joylashgan 6 ta oliy ta’limdagi 14 ta talabalar turar joylariga yo‘l oldi. Har bir talabalar turar joyiga kitoblar jamlanmasi sovg‘a qilindi.
Kitoblar karvoni to‘xtagan manzillarda talaba-yoshlarning quvonchi cheksiz. Eng yaxshi sovg‘alarni qo‘llariga tutgancha, varaqlashga tutinganlar, allaqachon mutolaa zavqiga kirishishdi. Kimdir izlab yurgan kitobini topganidan, yana kimdir o‘qigan asarining sevimli misralarini qayta va qayta o‘qishidan shod.
Hilol
