Fidoyilik va mehnat, sidqidildan amalga oshirilgan ijobiy ishlar har qachon qadrlanib va rag‘batlantirilib kelingan. Endigina ish boshlaganiga yarim yildan oshayotgan mahalla yoshlar yetakchilari o‘zlarini ham mehnati, ham tashabbuskorligi bilan ko‘rsatishga harakat qilishmoqda. Ko‘plab yoshlar taqdiriga ushbu lavozim egalari ta’mal toshini qo‘yayotgani ham, ayrim yoshlarning hayotida tub burilish yasayotgani ham bor gap.
Yoshlar ishlari agentligi va Respublika ma’naviyat va ma’rifat markazi Sariosiyo tuman bo‘linmasi hamkorligida “Fidoyi yoshlar yetakchisi” ko‘rik-tanlovining Sariosiyo tuman bosqichi o‘tkazildi.
Ushbu ko‘rik tanlovda mahallalardagi yoshlar yetakchilari 4 ta shart, ya’ni “Yoshlar siyosat bilimdoni”, “Samarali faoliyat”, “Innovatsion ijtimoiy loyiha” shuningdek, “Iqtidor va iste’dod” shartlari bo‘yicha bellashdilar.
Tanlov yakuniga ko‘ra, 1-o‘rin “Madankon” MFY yoshlar yetakchisi Shamsiddin Fatxullayevga nasib etdi. 2-o‘rinni “Shahriobod” MFY yoshlar yetakchisi Alisher Pardayev, 3-o‘rinni esa “Terakzor” MFY yoshlar yetakchisi Shoxista Meliboboyeva egalladi.
Tanlov g‘oliblari va faol ishtirokchilar tashkilotchilar tomonidan diplom va esdalik sovg‘alar bilan taqdirlandi hamda viloyat bosqichiga yo‘llanmani qo‘lga kiritdi.
A.Safarova
