Har bir inson hayotida qaysidir ma’noda kitobning o‘rni va ahamiyati bor, albatta. Umrida bir bor kitob ushlamagan, uning zarrin varaqlaridan duru gavhar termagan kishi topilmasa kerak. Jilla qursa qo‘limizga ilk saboqni olish ilinjida “Alifbe”ni olganimiz rost.
Bugungi kunda kitobxonlikni targ‘ib etish, aholining kitobxonlikka bo‘lgan qiziqishini oshirish borasida juda ko‘plab chora-tadbirlar amalga oshirilib kelinayotgani ham ayni haqiqat.
Kuni kecha “Yangi Oʻzbekiston yoshlari, birlashaylik!” shiori ostida boʻlib oʻtgan viloyat yoshlar festivalining ilk tadbirlari “Kitob karvoni” loyihasi bilan boshlanganidan xabaringiz bo‘lsa kerak. Shahar va tumanlardagi eng olis hududlarda yashovchi yoshlarning foydalanishlari uchun mahallalardagi yoshlar yetakchilariga yetkazib beriladigan 7 ming 500 dona eng sara badiiy asarlar yuklangan kitob karvoni Termiz shahridagi Yoshlar markazi binosi yonidan oʻz manzillariga qarab yoʻl olgan edi.
Hududlarga yuborilgan “Kitoblar karvoni” Qumqo‘rg‘on tumanining “Istiqlol” mahallasida ham O‘zbekiston Yoshlar ishlari agentligi faollari, mahalladagi yoshlar hamda volontyorlar tomonidan xursandchilik bilan kutib olindi.
Prezidentimizning 5 ta muhim tashabbusi doirasida tashkil etilgan eng sara badiiy asarlaridan iborat ushbu “Kitoblar karvoni” loyihasi “Istiqlol” mahallasidagi yoshlar hayotida muhim voqealardan biri bo‘lishiga, bu ularning kitobga bo‘lgan qiziqishini oshirishga shubha yo‘q.
E.Elmurodova
