O‘qish, izlanish, o‘rganish uchun harakatlar, albatta, o‘zining shirin mevasini bermay qolmaydi. Termiz tumani “Gulbahor” mahallasida yashovchi Otabek O‘rolovga bildirilgan ishonch o‘zini oqladi.
Otabek tarix fanidan o‘tkazilgan respublika olimpiadasida ishtirok etib, faxrli ikkinchi o‘rinni qo‘lga kiritdi va oliy ta’lim muassasiga o‘qishga kirish bo‘yicha grand sohibiga aylandi. Albatta, jarayon oson kechmadi. Bilim-salohiyat bo‘yicha raqiblar ham bo‘sh kelmadi. Shukrki, ustunlik vohadoshimiz Otabek tomonda bo‘ldi.
Samarqand shahrida bo‘lib o‘tgan taqdirlash marosimida sovrindor yigitga 2 400 000 so‘m miqdorida pul mukofoti hamda maxsus imtiyozli sertifikat topshirildi.
Hushxabarning daragi tez tarqaladi. Bu quvonchli xabar nafaqat Otabekning ota-onasi va yaqinlarining ko‘nglini shod etdi, balki eshitgan ko‘ngilni quvonchga to‘ldirib, farzandlarining-da ana shunday muvaffaqiyatlarga erishishini istab qo‘llarini duoga ochganlar qancha. Ha, ana shunday iste’dodli va bilimli yoshlar safi ko‘payaversin.
S.Murodova
