Ota-onalar endi farzandining maktabdagi o‘zlashtirishi, fanlardan olayotgan baholari va sinfdagi natijalarini bilish uchun maktabga borishiga hojat qolmaydi. Bu ma’lumotlarni my.gov.uz portali yoki MyGov mobil ilovasi orqali masofadan turib kuzatish mumkin.
Yangi xizmat orqali bolaning har bir fan bo‘yicha joriy baholari, o‘rtacha o‘zlashtirish ko‘rsatkichi, shuningdek, sinfdagi baholar statistikasi va o‘quv natijalari darajasi bilan tanishish imkoniyati yaratilgan. Bundan tashqari, ta’lim muassasasining nomi va manzili, maktabdagi o‘qituvchilar hamda o‘quvchilarning umumiy soni haqidagi ma’lumotlarni ham ko‘rish mumkin.
Xizmatdan foydalanish uchun my.gov.uz portaliga yoki MyGov ilovasiga kirib, shaxsiy kabinetdagi “Mening oilam” bo‘limini ochish, so‘ng bolaning ma’lumotlari yonidagi “Maktab ma’lumotlari” tugmasini bosish kifoya.
Mazkur xizmat ota-onalarga farzandining ta’lim jarayonini muntazam kuzatib borish, o‘zlashtirishidagi o‘zgarishlardan xabardor bo‘lish va zarur hollarda maktab bilan hamkorlikni kuchaytirishga yordam beradi.
