Surxondaryoda atrof-muhitga ta’siri yuqori bo‘lgan korxonalar ustidan ekologik nazorat kuchaytirilmoqda. Viloyatda I va II toifaga mansub 113 ta korxonada atmosfera havosi holatini muntazam kuzatib borish bo‘yicha tizimli ishlar olib borilmoqda.
Bugungi kunga qadar korxonalarda 41 ta fon va 2 ta avtomatik monitoring stansiyasi o‘rnatilib, ekologik kuzatuvlar yo‘lga qo‘yildi. Yana 14 ta korxona monitoring uskunalarini yetkazib beruvchi tashkilotlar bilan shartnomalar tuzib, zarur mablag‘larni to‘lagan va ayni paytda ularda stansiyalarni o‘rnatish ishlari davom etmoqda.
Mazkur qurilmalar atmosfera havosidagi ifloslantiruvchi moddalar miqdorini muntazam qayd etib, ma’lumotlarni tegishli monitoring tizimlariga uzatadi. Bu sanoat korxonalarining atrof-muhitga ta’sirini doimiy nazorat qilish, ekologik holatni tezkor baholash va zarur choralarni o‘z vaqtida ko‘rish imkonini beradi.
