1-oktyabrdan bir qator yangi tartib va imtiyozlar kuchga kiradi. Jumladan, urush nogironlari va ishtirokchilari, shuningdek, Chernobil halokatini bartaraf etishda qatnashgan fuqarolarga transportda bepul yoki 50 foiz chegirmali chiptalar taqdim etiladi. Buning uchun faqat shaxsni tasdiqlovchi hujjat talab qilinadi.
Shuningdek, fuqarolik-huquqiy shartnoma asosida ishlovchi o‘zini o‘zi band qilgan shaxslarga belgilangan ijtimoiy soliq to‘langanda bir yil ish staji avtomatik hisoblanadi.
Eksport qiluvchi tadbirkorlar uchun ayrim bojxona, fitosanitariya va boshqa sertifikatlar bo‘yicha yig‘imlar 30 foizga kamaytiriladi. Boshpanasiz shaxslar esa ishsiz sifatida e’tirof etilib, kasbga o‘qitish uchun vaucherlar olishi mumkin.
Bundan tashqari, qon mahsulotlari ikki bosqichli skriningdan o‘tkaziladi, tennis bo‘yicha yirik musobaqalar muntazam tashkil etiladi. Ayrim tadbirkorlar kredit foizlarining bir qismini kompensatsiya qilish imkoniyatiga ega bo‘ladi.
O‘qituvchi, shifokor, davlat xizmatchisi, faol o‘quvchi va talabalar hamda ayrim ijtimoiy toifadagi fuqarolarga teatr, kino va konsertlar uchun bepul vaucherlar beriladi. Buxoroning tarixiy hududida esa ayrim transport vositalarining harakatlanishi cheklanadi.
