Surxondaryoda “Yashil makon” umummilliy loyihasining kuzgi mavsumiga tayyorgarlik ishlari boshlandi. Joriy mavsumda viloyat bo‘ylab 11 million 187 ming tupdan ortiq ko‘chat ekish rejalashtirilgan.
Angor tumanida o‘tkazilgan yig‘ilishda viloyat hokimi Ulug‘bek Qosimov yashil bog‘ va o‘rmon hududlarini kengaytirish, ko‘chat plantatsiyalarini tashkil etish hamda hudud iqlimiga mos daraxt turlarini tanlash masalalariga e’tibor qaratdi.
Kuzgi mavsumda Angor tumanida qariyb 783 ming tup ko‘chat ekiladi. Ilg‘or mahallasida esa yashil belbog‘ barpo etish uchun bir gektar maydonda 1 667 tup ko‘chat ekish ko‘zda tutilgan. Hudud sharoitiga mos tut, katalpa, Eldor qarag‘ayi, jiyda, qayrag‘och va archa-tuya kabi daraxtlar tanlanadi. Eng muhimi, ko‘chatlarni ekish bilan birga ularni sug‘orish va parvarishlash tizimi ham yo‘lga qo‘yiladi.
Yashil belbog‘larni kengaytirish orqali hududlarni shamol va changdan himoyalash, ekologik muhitni yaxshilash maqsad qilingan.
