Yoshlikda olingan bilim toshga o‘yilgan naqshdek mustahkam bo‘ladi. Ayniqsa, bolalik davrida xavfsizlik bo‘yicha shakllangan ko‘nikmalar kelajakda favqulodda vaziyatlarda to‘g‘ri harakat qilishga xizmat qiladi.
Shu maqsadda Qumqo‘rg‘on tumani Favqulodda vaziyatlar bo‘limi xodimlari tomonidan 4-sonli davlat maktabgacha ta’lim tashkilotida zilzila va yong‘in sodir bo‘lganda to‘g‘ri harakat qilish bo‘yicha nazariy hamda amaliy mashg‘ulotlar tashkil etildi. Unda tarbiyachilar va xodimlarga bolalarni xavfsiz evakuatsiya qilish tartibi hamda birlamchi yong‘in o‘chirish vositalaridan foydalanish bo‘yicha tushuntirishlar berildi.
Bunday targ‘ibot tadbirlari nafaqat pedagoglarning, balki bolalarning ham ongida xavfsizlik madaniyatini shakllantirib, favqulodda vaziyatlarda hayotni asrashga xizmat qiladigan muhim bilim va ko‘nikmalarni mustahkamlaydi.
