Oliy Majlis Senati Kengashining Termiz shahrida o‘tkazilgan sayyor majlisida Surxondaryo viloyatini ijtimoiy-iqtisodiy rivojlantirish, aholi bandligini ta’minlash va kambag‘allikni qisqartirish bo‘yicha amalga oshirilayotgan ishlar tanqidiy muhokama qilindi.
Qayd etilishicha, 2026-yilning birinchi choragida viloyatda yalpi hududiy mahsulot 9,1 foizga, eksport esa 9,4 foizga oshgan. Shuningdek, 499,1 mln dollar xorijiy investitsiya o‘zlashtirilib, 77 ta loyiha ishga tushirilgani natijasida qariyb 900 ta yangi ish o‘rni yaratildi.
Shu bilan birga, ayrim sanoat korxonalarida ishlab chiqarish hajmining pasaygani, investitsiya loyihalari va bandlik bo‘yicha rejalarning ayrim tumanlarda to‘liq bajarilmagani tanqid qilindi. Yakunda hudud iqtisodiyotini rivojlantirish, investitsiyalarni jadallashtirish, eksportni kengaytirish va yangi ish o‘rinlari yaratish bo‘yicha mas’ullarga tegishli vazifalar belgilandi.
