Yoshlar bandligini ta’minlash va ularning biznes tashabbuslarini qo‘llab-quvvatlash bugungi kunda iqtisodiy rivojlanishning muhim yo‘nalishlaridan biridir. Shu maqsadda yoshlar tadbirkorligini rag‘batlantirishga qaratilgan yangi qaror qabul qilindi.
Adliya vazirligi ma’lumotiga ko‘ra, “Tadbirkorlik loyihalarini qo‘llab-quvvatlash orqali yoshlar bandligini ta’minlashga doir qo‘shimcha chora-tadbirlar to‘g‘risida”gi Prezident qaroriga (PQ–210-son, 01.06.2026-y.) muvofiq, AT “Aloqabank” tomonidan “Yoshlar biznesi” dasturi doirasida imtiyozli kreditlar ajratiladi.
Unga ko‘ra, 31 yoshga to‘lmagan fuqarolarga asosiy qarz bo‘yicha 1 yilgacha, foiz to‘lovlari bo‘yicha 3 oygacha imtiyozli davr bilan, 7 yilgacha muddatga kreditlar Markaziy bank asosiy stavkasidan 4 foiz punkt yuqori stavkada beriladi.
Shuningdek, sug‘urta polisi yoki 3-shaxs kafilligi asosida 100 mln so‘mgacha mikroqarzlar bir qator yo‘nalishlarda ajratilishi belgilangan. Jumladan, ta’lim va xorijiy tillarni o‘rganish, zamonaviy kasblar (IT, frilanserlik, mobilografiya, onlayn biznes), kasanachilik va tikuvchilik kabi loyihalar, shuningdek novvoychilik va qandolatchilik faoliyatlarini rivojlantirish uchun moliyaviy ko‘mak ko‘zda tutilgan.
Mazkur chora-tadbirlar yoshlarning biznes tashabbuslarini amalga oshirish, ularni kasb-hunarga yo‘naltirish hamda yangi ish o‘rinlarini yaratishga xizmat qiladi.
