Surxondaryo viloyatida g‘alla o‘rimi qizg‘in pallaga kirdi. Ayrim fermer xo‘jaliklarida har gektardan 100–110 sentnergacha hosil olinayotgani agrar sohadagi samarali mehnat natijasidir.
Viloyat hokimi Ulug‘bek Qosimov Angor, Muzrabot, Qiziriq, Jarqo‘rg‘on va Termiz tumanlarida bo‘lib, g‘alla o‘rimi hamda g‘o‘za parvarishi jarayonlarini o‘rgandi. Tashrif davomida yuqori hosildorlikka erishayotgan fermerlar faoliyati bilan tanishilib, “Shinjon” usulida ekilgan g‘o‘za maydonlarida olib borilayotgan agrotexnik tadbirlar ko‘zdan kechirildi.
Mutasaddilarga hosilni qisqa muddatlarda va talafotsiz yig‘ib olish, shuningdek, g‘o‘za parvarishini belgilangan muddatlarda sifatli tashkil etish bo‘yicha tegishli vazifalar belgilandi. Bu ishlar oziq-ovqat xavfsizligini ta’minlash va qishloq xo‘jaligi samaradorligini yanada oshirishda muhim ahamiyat kasb etadi.
