O‘zbekistonda raqobatga qarshi kelishuvlar hamda reklama qonunchiligini buzish holatlari haqida xabar bergan fuqarolarni rag‘batlantirish tizimi joriy etilishi mumkin. Bu bo‘yicha hujjat loyihasi jamoatchilik muhokamasiga qo‘yildi.
Loyihaga ko‘ra, kartel kelishuvlari yoki noqonuniy reklama holatlarini aniqlashda yordam bergan shaxslarga undirilgan jarima mablag‘idan pul mukofoti beriladi. Jumladan, raqobatga qarshi kelishuvlarni fosh etganlarga jarimaning 3 foizigacha, reklama qonunchiligi buzilgani haqida ma’lumot berganlarga esa 10 foizigacha mukofot ajratilishi rejalashtirilgan.
Ta’kidlanishicha, ayniqsa yashirin kartel va til biriktirishlarni aniqlash murakkab bo‘lib, bu jarayonda jamoatchilik nazoratini kuchaytirish muhim ahamiyat kasb etadi. Yangi tizim bozorda halol raqobatni ta’minlash va iste’molchilar manfaatini himoya qilishga xizmat qilishi kutilmoqda.
