Sport musobaqalari nafaqat yoshlarni sog‘lom turmush tarziga chorlaydi, balki hududning sport salohiyatini ham namoyon etadi. Shu ma’noda, Termiz shahri yana bir nufuzli sport tadbiriga mezbonlik qildi.
Shahardagi Alpomish kurash majmuasida professional boks kechasi tashkil etilib, unda yurtimizning turli hududlaridan tashrif buyurgan kuchli bokschilar ringga ko‘tarildi.
Voha sharafini xalqaro musobaqalarda muvaffaqiyat qozongan Asilbek Abdusamadov, Dilshodbek Abdumurodov, Asliddin Ro‘zimurodov hamda Dilfuza Bekova kabi mahoratli sportchilar himoya qildilar. Murosasiz va qiziqarli bellashuvlar sport muxlislariga unutilmas taassurot ulashdi.
