Surxondaryo viloyati hokimi Ulug‘bek Qosimov boshchiligidagi ishchi guruh Jarqo‘rg‘on tumanida bo‘lib, hududda infratuzilmani rivojlantirish hamda aholi bandligini ta’minlashga qaratilgan loyihalar ijrosini o‘rgandi.
Dastlab “Ismoiltepa” mahallasidagi issiqxonalar faoliyati ko‘zdan kechirildi. O‘rganish jarayonida ayrim issiqxonalar uchun yer maydonlari va bank kreditlari ajratilganiga qaramay, ulardan samarali foydalanilmayotgani tanqid qilindi. Bu holat bozorlarda oziq-ovqat mahsulotlari narxining oshishi va eksport ko‘rsatkichlariga salbiy ta’sir ko‘rsatayotgani ta’kidlandi.
Shuningdek, “Termiz Jayxun limonzori” MChJga qarashli 25 gektar issiqxonada gullar hamda qishloq xo‘jaligi ekinlari ko‘chatlari yetishtirish jarayonlari bilan tanishildi. Viloyat rahbari samarali tajribani boshqa issiqxonalarda ham joriy etish orqali yangi ish o‘rinlari yaratish bo‘yicha mas’ullarga topshiriqlar berdi.
Keyinchalik “Boymoqli” mahallasida infratuzilmani yaxshilash ishlari o‘rganildi. Mahallada ichimlik suvi ta’minoti yo‘lga qo‘yilgan bo‘lsa-da, ayrim ko‘chalarda tosh-shag‘al qoplamasi yotqizilmagani, eskirgan elektr ustunlari yangilanmagani va tadbirkorlik loyihalari sustligi qayd etildi. Mas’ullarga bu boradagi ishlarni jadallashtirish bo‘yicha aniq vazifalar belgilandi.
Tashrif yakunida “Markaziy Surxon” mahallasida barpo etilayotgan savdo va maishiy xizmat ko‘rsatish obyektlari qurilishi bilan tanishilib, loyihalarni belgilangan muddatda va sifatli yakunlash yuzasidan tegishli topshiriqlar berildi.
