Prezidentning 2026-yil 6-martdagi qaroriga muvofiq, 2026-yilgi Navroʻz bayramini munosib nishonlash bo‘yicha keng ko‘lamli tadbirlar tashkil etiladi. Xususan, bayram kunlari Yangi Oʻzbekiston majmuasida xalq sayillari, madaniy-ma’naviy va targ‘ibot tadbirlari o‘tkazilishi rejalashtirilgan.
Qarorga ko‘ra, “Navroʻzni ulugʻlash – insonni ulugʻlashdir!” g‘oyasi asosida bayram dasturi ishlab chiqilib, uning ijrosi ta’minlanadi. Bu yilgi Navroʻz Ramazon hayiti bilan hamohang tarzda nishonlanishi munosabati bilan “Mehribonlik”, “Saxovat” va “Muruvvat” uylarida yashovchi insonlar holidan xabar olish, ularga mehr va e’tibor ko‘rsatish tadbirlari ham tashkil etiladi.
Shuningdek, “Yashil makon” umummilliy loyihasi doirasida ko‘chat ekish tadbirlari, “Men ham ko‘chat ekaman” aksiyasi hamda umumxalq hasharlari o‘tkazilishi belgilangan.
