Sherobod tumanining “Xo‘jaqiya” mahallasida aholi xonadoniga kirib qolgan oq boshli qumoy fuqaro tomonidan ehtiyotkorlik bilan parvarish qilinib, viloyat Ekologiya va iqlim o‘zgarishi boshqarmasiga ko‘ngilli ravishda topshirildi. Qush belgilangan tartibda Termiz hayvonot bog‘iga yetkazildi va hozirda karantinga olingan. To‘liq sog‘ayib, tabiiy sharoitga moslashuvi ta’minlangach, u yana tabiatga qaytariladi.
Oq boshli qumoy tabiatda muhim ekologik vazifani bajaruvchi qush hisoblanadi. U sanitariya turi sifatida asosan o‘limtiklar bilan oziqlanib, atrof-muhitni biologik tozalashda hamda turli yuqumli kasalliklar tarqalishining oldini olishda muhim ahamiyat kasb etadi. Shu bois mazkur turning muhofazasi ekotizim barqarorligini ta’minlashda alohida o‘rin tutadi.
