Muzrabot tumaniga tashrif chog‘ida Surxondaryo viloyati hokimi Ulug‘bek Qosimov Mo‘g‘uliston bilan erishilgan kelishuvlar asosida olib kelinayotgan 850 bosh naslli qo‘ylarni ko‘paytirish loyihasi bilan tanishdi. Loyiha tashabbuskorlariga naslli qo‘ylarni mahalliy iqlimga moslashtirish, ilmiy asosda ko‘paytirish va chorvachilikni kengaytirish bo‘yicha tavsiyalar berildi.
Shuningdek, “Oriyat” mahallasidagi “Bless S.R” qo‘shma korxonasining 200 gektar maydonda tashkil etilgan issiqxona va agrologistika majmuasi faoliyati o‘rganildi. Bu yerda mahsulot yetishtirish, qadoqlash, saqlash va eksportga tayyorlash jarayonlari ko‘zdan kechirildi.
Uchrashuv yakunida mutasaddilarga korxona imkoniyatlaridan samarali foydalanish, eksport salohiyatini oshirish hamda aholi tomorqalarida eksportbop ekinlar yetishtirishni rag‘batlantirish bo‘yicha topshiriqlar berildi.
