Prezident qaroriga muvofiq, sun’iy intellekt sohasidagi startaplarni qo‘llab-quvvatlash maqsadida 2026–2027-yillarda Tiklanish va taraqqiyot jamg‘armasidan 100 million AQSH dollari yo‘naltiriladi.
Ajratiladigan mablag‘larning yarmi beg‘araz asosda davlat organlari va tashkilotlarida sun’iy intellekt texnologiyalarini joriy etish uchun sarflanadi. Qolgan 50 million dollari esa “Fondlar fondi” hamda “IT Park Ventures” venchur jamg‘armalarining ustav kapitaliga Tiklanish va taraqqiyot jamg‘armasi ulushi sifatida kiritiladi.
Mazkur tashabbus “Raqamli O‘zbekiston – 2030” strategiyasini amalga oshirish doirasida sun’iy intellekt ekotizimini rivojlantirish, innovatsion loyihalarni qo‘llab-quvvatlash va iqtisodiyot tarmoqlariga ilg‘or texnologiyalarni tatbiq etishni jadallashtirishga xizmat qiladi.
