Ertangi kunimiz egalari bo‘lgan yosh avlodni har tomonlama qo‘llab-quvvatlash, taklif va murojaatlarini tinglash, kasb-hunarga o‘qitish va bandligini taminlash, bir so‘z bilan aytganda, ularni ertangi kunga ishonch va vatanga sadoqat ruhida tarbiyalash bugungi kunning eng dolzarb vazifalaridan biri ekanligi sir emas albatta. 2024-yil — “Yoshlar va biznesni qo‘llab-quvvatlash yili” deb e’lon qilinganligi munosabati bilan viloyatimizda yoshlarning bo‘sh vaqtini mazmunli tashkil etish hamda bandligini ta’minlash borasida qator ishlar amalga oshirilmoqda.
Davlatimiz rahbarining joriy yil 5-aprel sanasidagi tegishli qaroriga asosan joylarda, yer olish istagida bo‘lgan yoshlar ro‘yxati shakillantirilib, ularga ekin yerlari ajratib berilmoqda. Termiz tumanining 2-sektor hududida joylashgan “Do‘stlik” mahallasida yoshlarga dehqon xo‘jaligini yuritish uchun yer maydonlarini ajratish bo‘yicha o‘quv seminari tashkil etildi.
Mazkur o‘quv seminarda mutaxassislar tomonidan elektron e-auksion savdo platformasi hamda yer maydonlarini ijaraga olish borasida tushunchalar berib o‘tildi. Shuningdek, tadbir davomida 2-sektor hududidagi mahallalarda istiqomat qilib kelayotgan 30 nafar yoshlarga 30 yil muddatga, 50 sotixdan ijaraga yer maydonlari ajratilib, sertifikatlar topshirildi.
N.Musayeva
