XABARINGIZ BORMI?

Farzandlarimizning kontrakt pulini ish haqimizdan to‘lasak, ma’lum miqdordagi daromad solig‘idan ozod etilgan edik. Afsuski, bunda talabalarning yoshi chegaralanganligi ko‘pchilikning ham bu imkondan foydalanishiga to‘sqinlik qilardi. Prezident tomonidan imzolangan Qonun (O‘RQ-891-son, 28.12.2023-y.) bilan ayrim qonun hujjatlariga o‘zgartirish va qo‘shimchalar kiritilishi natijasida ota-onalarning har qanday yoshdagi farzandlari kontrakti uchun to‘lagan pullari daromad solig‘idan ozod qilingani eng yaxshi yangilik bo‘ldi.
Qolaversa, 2028-yil 31-dekabrgacha O‘zbekiston rezidentlari va norezidentlari bo‘lgan jismoniy shaxslarning (aksiyadorlarning) aksiyalar bo‘yicha dividendlar tarzidagi daromadlari jismoniy shaxslardan olinadigan daromad solig‘idan ozod qilinadi. O‘zbekistonning norezidentlari bo‘lgan yuridik shaxslarning (aksiyadorlarning) aksiyalari bo‘yicha dividendlar tarzidagi daromadlariga foyda solig‘i bo‘yicha 5 foiz miqdorida soliq stavkasi qo‘llaniladi. O‘zbekistonning rezidentlari va norezidentlari bo‘lgan jismoniy va yuridik shaxslarning xo‘jalik jamiyatlari obligatsiyalari bo‘yicha foizlar tarzidagi daromadlari jismoniy shaxslardan olinadigan daromad solig‘idan hamda foyda solig‘idan ozod etiladi. Eslatib o‘tish joizki, Ushbu Qonun 2024-yil 1-yanvardan e’tiboran kuchga kirgan.