Kunlar sovushi bilan metan va benzin AYOQShlarida mashinalarning turna qator bo‘lib tizilgancha navbat kutayotganining guvohi bo‘lish mumkin. Aholi xonadonlarida gaz ta’minotini yaxshilash uchun metan AYOQShlarida cheklovlar o‘rnatilishidan xabardormiz. Ammo, bu holat yo‘l haqining keskin oshishiga sabab bo‘layapti. Surxondaryo viloyati hokimi Ulug‘bek Qosimov rahbarligida o‘tkazilgan viloyat navbatchilik Shtabi muhokamasida ushbu holat bo‘yicha mas’ullarning hisoboti tinglandi.
Viloyatdagi mavjud 220 dan ortiq AYOQSHlarning 61 tasida benzin sotuvi yo‘lga qo‘yilgan va metan shahobchalarining ishlash vaqti uzaytirildi. Ko‘rilayotgan choralar navbatlarni qisman kamaytirgani, lekin bu yetarli emasligi, benzin yetkazib berish hajmini oshirish, narx va sifatini qat’iy nazorat qilish lozimligi qayd etildi.
Mas’ullarga yo‘l qo‘yilgan kamchiliklarni bartaraf etish bo‘yicha aniq muddatlar bilan vazifalar yuklandi.
