Turizmni rivojlantirish o‘sha davlatning madaniyati, san’ati va boshqa ko‘plab jihatdan tanitish bilan birga, mo‘may daromad ham keltiradi. Ayniqsa, yurtimizga tashrif buyuradigan turistlarni mahalliy aholini turmush-tarzi, hayoti, odat va qadriyatlar bilan yanada yaqinroq tanishtirish maqsadida xonadonlar, mahallalarda munosib shart-sharoitlar, xizmatlar yaratilishi keng yo‘lga qo‘yilayotir. Surxon vohasida ham gastranomik turizmni rivojlantirish maqsadida Termiz shahri, Boysun va Sariosiyo tumanidagi qator mahallalar tanlab olindi va master rejalar ishlab chiqildi.
Surxondaryo viloyati hokimi Ulug‘bek Qosimov Sariosiyo tumanidagi “Smart communication” MChJda bo‘lib, loyihalash, qurilish-ta’mirlash faoliyati bilan shug‘ullanuvchi, sohada ko‘p yillik tajribaga ega “SIGMA Tashkent” MChJ tomonidan ishlab chiqilgan master rejalar taqdimoti bilan tanishdi. Kompaniya mutaxassislari va mas’ullar ishtirokida loyihalar muhokama qilindi.
