Yoshlarni harbiy-vatanparvarlik ruhida tarbiyalash bilan birga, ularni mustaqil hayotga tayyorlash va kasb-hunarga yo‘naltirishga qaratilgan “Jasorat maktabi” o‘quv yig‘inlari Surxondaryoda amaliy mazmun kasb etmoqda. Joriy yilning dastlabki 8 oyida viloyatda 4 marotaba tashkil etilgan yig‘inlarda 400 nafarga yaqin yosh ishtirok etib, 10 dan ortiq yo‘nalishda kasb-hunar va hayotiy ko‘nikmalarni egalladi.
Navbatdagi o‘quv yig‘ini Qoraqalpog‘iston Respublikasining Taxiatosh tumanidan kelgan 32 nafar yosh uchun Janubi-G‘arbiy maxsus harbiy okrug tasarrufidagi Kakaydi garnizonida joylashgan harbiy qismda o‘tkazildi. Yoshlar mashg‘ulotlar davomida harbiy tartib-intizom, jasorat va jamoaviylik bilan bir qatorda, amaliy ko‘nikmalarni ham o‘zlashtirdi.
O‘quv yig‘ini yakunida ishtirokchilarning egallagan bilim va ko‘nikmalari sarhisob qilinib, faol yoshlar rag‘batlantirildi. Barcha qatnashchilarga esdalik sovg‘alari va tashakkurnomalar topshirildi.
