O‘qituvchi va murabbiylar kuni munosabati bilan Surxondaryo viloyati Maktabgacha va maktab ta’limi boshqarmasi boshlig‘i Bekzod Tashpulatov ta’lim sohasida ko‘p yillar mehnat qilgan bir guruh nuroniy ustozlar bilan uchrashdi.
Suhbatda ustozlarning ta’lim tizimida orttirgan tajribasi, yosh avlod tarbiyasida bosib o‘tgan yo‘li va bugungi pedagoglar uchun qoldirayotgan saboqlari haqida fikr almashildi.
Zero, ta’limda zamonaviy yondashuvlar qanchalik muhim bo‘lmasin, yillar davomida shakllangan ustozlik tajribasining o‘rni alohida. Bir avlodning tajribasi ikkinchisiga o‘tishi esa ta’limdagi davomiylikni ta’minlaydi.
Uchrashuv yakunida nuroniy ustozlarga tashakkurnomalar va esdalik sovg‘alari topshirildi.
