Aholining osoyishtaligi va normal dam olishini ta’minlash maqsadida O‘zbekistonda shovqinning zararli ta’siridan himoya qilishga qaratilgan yangi qonun qabul qilindi.
Qonunga ko‘ra, ish kunlari soat 23:00 dan 07:00 gacha, dam olish va bayram kunlari esa 22:00 dan 09:00 gacha belgilangan me’yordan ortiq shovqin qilish taqiqlanadi. Turar joylarda qurilish, ta’mirlash va rekonstruksiya ishlari esa faqat ish kunlari 09:00 dan 18:00 gacha amalga oshirilishi mumkin. Dam olish va bayram kunlari bunday shovqinli ishlarni bajarishga yo‘l qo‘yilmaydi.
Talablarni buzganlik uchun jarimalar ham sezilarli darajada oshiriladi. Birinchi qoidabuzarlik uchun fuqarolarga 1,32 mln so‘mdan 2,2 mln so‘mgacha, mansabdor shaxslarga 4,4 mln so‘mdan 6,6 mln so‘mgacha jarima solinishi mumkin.
Agar qoidabuzarlik bir yil ichida takrorlansa, fuqarolar uchun jarima 3,08 mln so‘mgacha, mansabdor shaxslar uchun esa 8,8 mln so‘mgacha yetadi.
Mazkur qonun aholining tinchligi, sog‘lig‘i va dam olish huquqini himoya qilish, shovqin bilan bog‘liq muammolarning oldini olish hamda yashash muhitida osoyishtalikni ta’minlashga xizmat qiladi.
