2027-yil 1-yanvardan mehnat shartnomasi asosida ishlayotgan, bir yoshgacha farzandi bor ayollarga bola parvarishlash nafaqasi to‘lanadi.
Prezident farmoniga muvofiq, nafaqa xodimning homiladorlik va tug‘ish ta’tili tugagan kundan boshlab farzandi 1 yoshga to‘lguniga qadar Davlat ijtimoiy sug‘urta jamg‘armasi tomonidan beriladi. Bu tartib farzandi bir yoshga to‘lmasdan ishga qaytgan ayollar uchun ham muhim ijtimoiy qo‘llab-quvvatlash chorasi hisoblanadi.
Shuningdek, 2027-yildan aholining ijtimoiy yordamga ehtiyojini aniqlashda oilaning moliyaviy holati bilan birga sog‘liq, nogironlik, tashqi mehnat migratsiyasi va ko‘p farzandlilik kabi mezonlar ham hisobga olinadi.
Mazkur yangilik ishlayotgan onalarni qo‘llab-quvvatlash, oilalarning ijtimoiy himoyasini kuchaytirish hamda bola parvarishi davrida ayollar uchun qo‘shimcha kafolatlar yaratishga qaratilgan.
