Surxondaryo ta’lim tizimining xalqaro aloqalarini rivojlantirish, zamonaviy tajribalarni o‘rganish va kadrlar salohiyatini oshirishga qaratilgan muhim kelishuvlarga erishildi. Viloyat hokimi Ulug‘bek Qosimov boshchiligidagi delegatsiya Belarus Respublikasi Ta’lim vaziri Andrey Ivanets bilan uchrashib, ta’lim muassasalari o‘rtasidagi hamkorlikni kengaytirish masalalarini muhokama qildi.
Kelishuvlarga ko‘ra, Termiz davlat universitetida axborot texnologiyalari, pedagogika va rus tili, Termiz davlat muhandislik va agrotexnologiyalar universitetida esa qishloq xo‘jaligi, agrotexnologiya va texnik yo‘nalishlarda qo‘shma dasturlar hamda professor-o‘qituvchi va talabalar almashinuvi yo‘lga qo‘yiladi. Shuningdek, Surxondaryodagi “in vitro” laboratoriyalariga Belarus mutaxassislarini jalb etish masalasi ham ko‘rib chiqildi.
Muzokaralar yakunida Surxondaryo va Belarusning yetakchi ta’lim muassasalari o‘rtasida to‘g‘ridan-to‘g‘ri hamkorlikni kengaytirish bo‘yicha kelishuvlarga erishildi.
