Yurtimizda davlat xizmatlari sifatini oshirish hamda korrupsiyaga qarshi murosasiz kurashish borasida izchil islohotlar amalga oshirilmoqda. Ushbu islohotlar barcha sohalar qatori arxiv tizimida ham o‘zining amaliy ifodasini topmoqda.
Xususan, Sariosiyo tuman davlat arxivida fuqarolarga sifatli, tezkor va shaffof xizmat ko‘rsatish, halollik va adolat tamoyillariga qat’iy amal qilish ustuvor vazifalardan biri hisoblanadi.
Arxiv muassasasi faoliyatining asosiy maqsadi fuqarolar, tashkilotlar va muassasalarga arxiv hujjatlari asosida ishonchli ma’lumotlarni taqdim etish, tarixiy hujjatlarni asrab-avaylash hamda ulardan samarali foydalanishni ta’minlashdan iborat. Mazkur vazifalarni bajarishda ochiqlik va shaffoflik tamoyillariga alohida e’tibor qaratilmoqda.
Kelib tushayotgan jismoniy va yuridik shaxslarning murojaatlari amaldagi qonunchilik talablariga muvofiq qabul qilinadi, ro‘yxatga olinadi va belgilangan muddatlarda ko‘rib chiqiladi. Har bir murojaat bo‘yicha arxiv hujjatlari sinchkovlik bilan o‘rganilib, murojaatchiga asosli va xolis javob taqdim etiladi. Bu esa fuqarolarning qonuniy huquq va manfaatlarini ta’minlashga xizmat qilmoqda.
Ayniqsa, arxiv faoliyatini raqamlashtirish ishlari bosqichma-bosqich amalga oshirilmoqda. Arxiv hujjatlarini elektron shaklga o‘tkazish, elektron ma’lumotlar bazalarini shakllantirish hamda zamonaviy axborot-kommunikatsiya texnologiyalaridan keng foydalanish xizmatlar sifatini oshirish bilan birga, ularning shaffofligini ham ta’minlamoqda. Raqamlashtirish jarayoni hujjatlarning saqlanishini mustahkamlash va ulardan foydalanishni yanada qulaylashtirishga xizmat qilmoqda.
Tuman davlat arxivida korrupsiyaning oldini olish bo‘yicha tizimli ishlar olib borilmoqda. Xodimlar tomonidan xizmat vazifalarini bajarishda halollik, xolislik, qonuniylik va xizmat odobi qoidalariga qat’iy rioya etilishi ta’minlanadi. Korrupsiyaga sabab bo‘lishi mumkin bo‘lgan omillarni bartaraf etish, manfaatlar to‘qnashuvining oldini olish hamda fuqarolar bilan ochiq muloqotni yo‘lga qo‘yish doimiy e’tiborda turadi.
Shuningdek, arxiv xizmatlaridan foydalanish tartibi, zarur hujjatlar ro‘yxati, murojaatlarni ko‘rib chiqish muddatlari va boshqa muhim ma’lumotlar fuqarolar uchun ochiq holda taqdim etiladi. Bu esa xizmatlardan foydalanishda tenglik va adolat tamoyillarini mustahkamlashga xizmat qiladi.
Arxiv xodimlarining kasbiy malakasini oshirish, huquqiy bilimlarini mustahkamlash hamda korrupsiyaga qarshi kurashish bo‘yicha muntazam o‘quv-seminarlar va targ‘ibot tadbirlari tashkil etib borilmoqda. Bunday tadbirlar jamoada halollik madaniyatini shakllantirish va xizmat sifatini yanada yaxshilashga xizmat qiladi.
Daler Norboyev,
Sariosiyo tuman davlat arxivi
yetakchi arxivchisi
