Jamoat transporti sifati faqat zamonaviy avtobuslar bilan emas, balki yo‘lovchilar uchun yaratilgan qulay va xavfsiz muhit bilan ham belgilanadi. Bekatlarning iqlimga mos, ekologik va zamonaviy ko‘rinishda barpo etilishi transportdan foydalanish madaniyatini yuksaltirishga xizmat qiladi.
Shu maqsadda Toshkent shahrida “Yashil bekatlar” loyihasini sinov tariqasida amalga oshirish taklif etildi. Dastlab 10–20 ta bekatda quyoshdan samarali himoya qiluvchi soyabonlar, quyosh panellari, energiya tejamkor yoritish tizimlari, kam suv talab qiladigan mahalliy o‘simliklar, tabiiy shamollatish imkonini beruvchi konstruksiyalar hamda imkoniyatdan kelib chiqib velosiped turargohlari va yomg‘ir suvini yig‘ish tizimlarini joriy etish rejalashtirilgan.
Loyihaning eng muhim jihati — u Toshkentning iqlim sharoitiga mos yechimlarni sinovdan o‘tkazishni nazarda tutadi. Agar ushbu tajriba ijobiy natija bersa, bunday zamonaviy bekatlarni respublikaning boshqa hududlarida ham barpo etish nafaqat yo‘lovchilar uchun qulaylik yaratadi, balki energiya tejamkorligi, ekologik barqarorlik va shahar infratuzilmasini yanada insonparvar tamoyillar asosida rivojlantirishga ham munosib hissa qo‘shadi.
