Prezident Shavkat Mirziyoyev davlat boshqaruvining yagona integratsiyalashgan raqamli platformasini joriy etish, startaplar ekotizimini rivojlantirish va telekommunikatsiya sohasini qo‘llab-quvvatlash bo‘yicha taqdimot bilan tanishdi.
Yangi platforma sun’iy intellekt asosida hududlar iqtisodiyoti, investitsiyalar, ekologiya, xavfsizlik, infratuzilma va aholini qiynayotgan muammolarni yagona tizimda tahlil qilish hamda boshqaruv qarorlarining samaradorligini oshirishga xizmat qiladi. Tizim joriy yilda Toshkent shahrida, 2027-yildan esa barcha hududlarda bosqichma-bosqich ishga tushirilishi rejalashtirilgan.
Shuningdek, milliy navigatsiya tizimini yaratish, startaplar uchun 530 million so‘mgacha imtiyozli kreditlar ajratish hamda olis hududlardagi tadbirkorlar uchun qulay telekommunikatsiya tariflarini joriy etish taklif qilindi.
Davlat rahbari mazkur tashabbuslarni ma’qullab, davlat idoralari ma’lumotlarini integratsiya qilish, raqamli xizmatlar sifatini oshirish, kiberxavfsizlikni kuchaytirish va xususiy sektor uchun yanada qulay muhit yaratish bo‘yicha topshiriqlar berdi.
