Oliy Majlis Qonunchilik palatasi lotin yozuviga asoslangan o‘zbek alifbosini takomillashtirishga oid qonun loyihasini qabul qildi. Loyihaga ko‘ra, amaldagi 26 ta harf va 3 ta harflar birikmasi o‘rniga alifbo 28 ta harf hamda 1 ta tutuq belgisidan iborat bo‘lishi rejalashtirilmoqda.
Qonun loyihasi bosqichma-bosqich joriy etiladi. Avval rasmiylashtirilgan hujjatlar, milliy valyuta, qimmatli qog‘ozlar, shuningdek, davlat organlarining peshlavha va ramziy belgilari belgilangan muddatgacha amalda qoladi.
Mazkur yondashuv alifbodagi o‘zgarishlarni ortiqcha budjet xarajatlarisiz, davlat idoralari va tashkilotlari uchun qulay hamda izchil tarzda amalga oshirish imkonini beradi.
Qonun loyihasi endilikda ko‘rib chiqish uchun Senatga yuborildi.
