Qishloq xo‘jaligida suvni tejovchi texnologiyalarni keng joriy etish, hosildorlikni oshirish va fermer xo‘jaliklari daromadini ko‘paytirish bugungi kunning muhim vazifalaridan biridir.
Uzun tumanining Yangi hayot mahallasida “Yashil Agro Kamol” MCHJ tomonidan 2 gektar maydonda bodring yetishtirilmoqda. Ekin maydonida tomchilatib sug‘orish texnologiyasidan foydalanilayotgani natijasida suv resurslaridan oqilona foydalanilib, yuqori hosildorlikka erishilmoqda.
Ayni paytda har 50 sotix yer maydonidan o‘rtacha 70 tonnagacha hosil olinmoqda. Yetishtirilgan mahsulot ichki bozorlarga yetkazib berilib, aholi ehtiyojini qondirish hamda qishloq xo‘jaligi ishlab chiqarish samaradorligini oshirishga xizmat qilmoqda.
Mazkur tajriba zamonaviy agrotexnologiyalarni qo‘llash orqali yer va suv resurslaridan unumli foydalanish, sifatli mahsulot yetishtirish va daromadni oshirish mumkinligini ko‘rsatmoqda.
