O‘zbekiston Respublikasi Prezidentining PQ–141-son qarori ijrosi doirasida Muzrabot tumanida “Qishloq joylarni kompleks rivojlantirish” loyihasi asosida keng ko‘lamli bunyodkorlik ishlari amalga oshirilmoqda. Loyiha Islom taraqqiyot banki va BMT Taraqqiyot dasturi hamkorligida hayotga tatbiq etilmoqda.
Mazkur loyiha doirasida Chegarachi mahallasida ham qurilish va obodonlashtirish ishlari izchil davom etmoqda. Xususan, 22-sonli umumta’lim maktabi hududida “Chinor” MCHJ tomonidan 330 o‘rinli qo‘shimcha o‘quv binosi barpo etilmoqda. Ayni paytda uch qavatli binoning uchinchi qavatida qurilish ishlari olib borilmoqda.
Loyiha yakunlangach, o‘quvchilar uchun zamonaviy va qulay ta’lim sharoitlari yaratilishi, hududdagi ta’lim infratuzilmasi esa sezilarli darajada yaxshilanishi kutilmoqda. Bu esa qishloq hududlarida ta’lim sifatini oshirish va yoshlar uchun keng imkoniyatlar yaratishda muhim ahamiyat kasb etadi.
