“Eco Expo Central Asia 2026” xalqaro ko‘rgazmasi doirasida Surxondaryo viloyati Ekologiya va iqlim o‘zgarishi bosh boshqarmasi hamda Xitoyning Auris-Green Tech kompaniyasi o‘rtasida hamkorlik memorandumi imzolandi.
Kelishuv asosida hududda atmosfera havosi sifatini avtomatik monitoring qilish, zamonaviy chang-gaz tozalash uskunalarini joriy etish, suv tozalash inshootlarini qurish va modernizatsiya qilish hamda ekologik nazorat tizimini raqamlashtirish bo‘yicha loyihalar amalga oshiriladi.
Mazkur hamkorlik viloyatda ekologik xavfsizlikni kuchaytirish, atrof-muhitni muhofaza qilish va aholi salomatligini ta’minlashda muhim qadam bo‘lib xizmat qiladi.
