Muqaddas Haj ziyoratini ado etib qaytayotgan surxondaryolik hojilarni kutib olish tadbirlari viloyatda boshlandi. Joriy yilda “Prezident hojisi” maqomiga sazovor bo‘lgan 7 nafar vohadoshimiz muborak safarni muvaffaqiyatli yakunlab, Vatanga qaytdi.
Ilk ziyoratchilar viloyat mutasaddilari, diniy soha vakillari hamda yaqinlari tomonidan tantanali va samimiy ruhda kutib olindi. Marosimda hojilar muborak amallarni sog‘-salomat ado etib kelgani bilan qutlanib, ularning duolari ijobat bo‘lishi tilandi.
O‘z navbatida, hojilar safar davomida yaratilgan sharoitlar uchun minnatdorlik bildirib, muqaddas maskanlarda yurtimiz tinchligi, xalqimiz farovonligi va Surxon vohasining ravnaqi uchun duolar qilganliklarini ta’kidladi.
