Vyetnamning Da Nang shahrida sport kurashlari bo‘yicha U17 Osiyo chempionati bo‘lib o‘tdi. Nufuzli musobaqa yosh sportchilar uchun xalqaro maydondagi mahoratini namoyish etish va qit’aning eng kuchli polvonlari bilan bellashish imkoniyatini yaratdi.
Musobaqada ayollar kurashi yo‘nalishida ishtirok etgan Jarqo‘rg‘on tuman sport maktabi tarbiyalanuvchisi Shahzoda Azimova yuksak mahorat, matonat va g‘alabaga bo‘lgan intilish namunasini ko‘rsatdi.
Murosasiz bahslar yakunida sportchimiz faxrli 3-o‘rinni egallab, Osiyo chempionatining bronza medaliga sazovor bo‘ldi. Ushbu natija nafaqat Shahzoda Azimovaning, balki Surxondaryo sporti rivojida erishilgan muhim yutuqlardan biri sifatida e’tirof etilmoqda.
